Marc-André ter Stegen ka vendosur të mos nënshkruajë raportin mjekësor të Barcelonës për dëmtimin e tij në shpinë – një hap i domosdoshëm për ta paraqitur raportin në Komitetin Mjekësor të La Ligës. Si rezultat, klubi ka vendosur të hapë procedurë disiplinore ndaj tij.
Një tjetër polemikë në zyrat e Barcelonës. Sipas ‘Mundo Deportivo’, klubi ka nisur procedura disiplinore ndaj portierit gjerman, pasi ai ka refuzuar të nënshkruajë raportin mjekësor për lëndimin e tij.
Klubi kishte nevojë për autorizimin e portierit për ta dërguar raportin në Komisionin Mjekësor të La Ligës, i cili do të vendosë nëse mungesa e Ter Stegen do të zgjasë më shumë se katër muaj dhe, rrjedhimisht, nëse 80% e pagës së tij mund të përdoret për të nënshkruar lojtarë të rinj.
Ter Stegen e sfidoi klubin edhe më herët, kur postoi në rrjete sociale – përpara ndërhyrjes kirurgjikale në shpinë – se do të mungonte për tre muaj. Kjo e pengoi Barcelonën të bënte lëvizje financiare për të lehtësuar kufizimet e Fair Play-it Financiar. Marrëdhënia mes portierit gjerman dhe klubit është përkeqësuar që nga nënshkrimi i Joan Garcia, që në thelb i dha fund së ardhmes së Ter Stegen te Barça.
Tani, Ter Stegen përballet me procedura disiplinore dhe, nëse shërbimet ligjore vendosin, mund të marrë edhe një ndëshkim të brendshëm nga klubi, për sa kohë që ai miratohet nga Bordi i drejtorëve, sipas të njëjtit burim.
