Pas fitores ndaj Proton Cable Prizrenit në xhiron e kaluar, Peja e ka shënuar edhe fitoren e dytë rresht në elitën e basketbollit kosovar.
Pejanët të shtunën në palesrën “1 Tetori” në Prishtinë, ia shkaktuan Borës humbjen e dytë të njëpasnjëshme, në ndeshjen e xhiros së 17-të.
Peja fitoi me gjashtë pikë dallim, 85:79, ndonëse skuadra prishtinase pjesën e parë e mbylli me një pikë epërsi 51:50.
Vendimtare në fitoren e Pejës ishte periudha e dytë, të cilën mysafirët e fituan me shifrat 21:11.
Në dhjetëminutëshin e fundit, Bora u mundua të kthehej në lojë dhe u afrua edhe në tri pikë, 79:82, 47 sekonda para fundit të ndeshjes.
Por “verdhezinjtë” u treguan më të suksesshëm në përfundim të ballafaqimit dhe nuk lejuan befasi.
Tristan Ikpe pati dyshifror të dyfishtë prej 22 pikëve e 13 kërcimeve, ndërsa shtoi edhe dy asistime.
I pati statistikat më të mira te Peja.
Kontribut në fitore me 15 pikë, 13 kërcime e dy asistime dha edhe Jonathan Galloway.
Desmond Cambridge Jr ishte më i miri te skuadra e tij me 24 pikë, pesë kërcime e tri asistime.
Por, nuk mjaftuan për ta shmangur humbjen.
Peja pas 17 ndeshjeve të luajtura i ka dhjetë fitore e shtatë humbje, dhe zë vendin e tretë me 27 pikë.
Bora në pozitën e parafundit mbetet me pesë fitore e 12 humbje dhe me 22 pikë të grumbulluara.
