Përgatitjet e Nigerisë për ndeshjen vendimtare të “play-off”-it të Kupës së Botës 2026 kundër Gabonit janë futur në kaos pasi lojtarët dhe stafi bojkotuan stërvitjen në shenjë proteste për bonuset e papaguara.
Kombëtarja e Nigerisë bojkotoi stërvitjen të martën, vetëm dy ditë para ndeshjes vendimtare të kualifikimeve për Kupën e Botës kundër Gabonit, që do të zhvillohet në Marok.
Protesta vjen si rezultat i borxheve të papaguara prej vitesh, përfshirë shpërblime dhe dieta ndeshjesh, disa prej të cilave datojnë që nga viti 2019. Kjo situatë ka nxjerrë në pah tensionet brenda skuadrës në një moment vendimtar të fushatës kualifikuese të Nigerisë.
Sipas BBC Sport Africa, greva përfshin si lojtarët ashtu edhe stafin teknik, të cilët janë lodhur nga vonesat e përsëritura të pagesave nga Federata e Futbollit të Nigerisë (NFF).
Yje si Victor Osimhen dhe Ademola Lookman i janë bashkuar protestës, duke kërkuar transparencë dhe veprim nga federata.
“Kështu që, sapo të gjendet një zgjidhje, ne do të jemi të parët që do ta konfirmojmë,” shkroi kapiteni i skuadrës William Troost-Ekong në platformën X (Twitter). Ai shtoi: “Gjithçka që duam dhe vazhdojmë të bëjmë është të fokusohemi te ndeshjet e mëdha që na presin.”
Bojkoti ka hedhur një hije të rëndë mbi përgatitjet për ndeshjen gjysmëfinale të “play-off”-it të së enjtes, që do të zhvillohet në stadiumin Moulay Hassan në Rabat. Burime pranë NFF-së i thanë BBC Sport Africa se po zhvillohen bisedime urgjente për të rikthyer rendin përpara ndeshjes, ndërsa federata ende nuk ka dhënë një deklaratë zyrtare.
Skuadra e Nigerisë pritet të rikthehet në stërvitje të mërkurën, nëse arrihet një marrëveshje. Nigeria duhet të mposhtë Gabonin për të mbajtur gjallë shpresat për kualifikim në finalet e Kupës së Botës 2026, që do të zhvillohen në Kanada, Meksikë dhe Shtetet e Bashkuara.
Fituesi i kësaj përballjeje do të ndeshet me Kamerunin ose Republikën Demokratike të Kongos në finalen afrikane të “play-off”-it të së dielës. Më pas, fituesi do të marrë pjesë në kualifikimet ndërkontinentale në mars — një mini-turne me gjashtë ekipe që do të përcaktojë dy vendet e fundit për në Kupën e Botës të vitit të ardhshëm.
